Bago makaabot sadto gate ku baloy namo, nagbalik sa isip ko a nagkapirang manga pangyayari kanako ku igin pa ko. Minsan malang langkaw ku kalintura ko. Malang ngitngit ku gab-i. Uda kuryente sadto kanamong baloy kadto kaya gamit namo petromax. Diri maisiyan ni mama kin uno gigibon ta uda si papa. Kaiba si papa ku mga soldados na nagsakyada ku manga NPA sa Nierva. Naisipan ni mama na baoyon si Tang Sario na usad na albularyo na kaabay sana namo a baloy. Pagkabayad kanako ni Tang Sario pina-andig niya ko sa ringring ku kuwarto namo. Inuyopan niya su lalawgon ko. Nagrimorimo iya sa mga orasyon na diri ko maintindiyan. Pinalibutan niya ko sa mga palito na usad-usad niyang sinabritan. Napalibutan ako sa asu galin sadto mga palito. Nagdiliryo si Tang Sario pakatapos pirang minutos ibinuklat niya su mga mata niya saka tinakpulan su pisngi ko sa papel na liniwuyan niya. Pakagalin ni Tang Sario namate ko na diri na ko nagkukubogkubog sa agnow. Paggisong ko kinaramragan uda na ko kalintura.
Pag-abot namo sadto gate ku baloy, biglang napondo su mga iniisip ko. Sinabat ako ku mga pamangkin ko. Iba na ngowan sadto baloy. Agko na kuryente. Dakul nang mga gamit. Iba na manga pag-abayan. Manga maku-apo ni Tang Sario nakaistar sa dating baloy ku albularyo. Nagraan na si Tang Sario mala ngani ta kin a mga tawo sa binuyoan nag-iilang diretso na sira sa ospital.
Alas diyes na. Pabalik na ko sa naga city. Paryong tinampo a inagyan namo. Paglilili ko a nabayad ko talbu galin sa sityo binuyoan.
